تورعاي وڭىرىندە  كومپوزيتور باقىتجان بايقاداموۆتىڭ 100 جىلدىعى اتالىپ ءوتتى

ەكى كۇنگە سوزىلعان شارانى الدىمەن «ايگولەك» اتتى بالالار ءان بايقاۋى باستادى. بالاپان قانات انشىلەر باقىتجان اتاسىنىڭ اندەرىنەن ونەر كوگىنە كۇمىس تەڭگە شاشتى. بايقاۋعا باقىتجان بايقاداموۆتىڭ شاكىرتى بولۋ باقىتىن يەلەنگەن قازىرگى  قازاق مۋزىكا ونەرىنىڭ مايتالماندارى  اتانعان كومپوزيتورلار بالنۇر قىدىربەك, جولامان تۇرسىنباەۆ, قاليبەك دەربسالدين, قايىرجان ماقانوۆتار   قاتىستى. اكەسىنىڭ تۋعان جەرىندەگى كەشكە  قىزدارى  بالدىرعان, ايكۇن, ءاليا بايقاداموۆالار جانە نەمەرەلەرى شاقىرىلدى. ايتپاقشى, زەرتتەۋشى-عالىم بالدىرعان بايقاداموۆا «ايگولەك» بالالار ءان بايقاۋىنا قازىلىق ەتتى.  جۇلدەلى ورىن العان  ەرناز قابدىحاميتوۆ, تۇرىسبەك نۇربولات, اقمىرزا اياۋلىم, جاپار ايسۇلۋ, جۇماعالي ايناز, اقنيەت ازاماتقىزى سەكىلدى بالالاردىڭ ونەرىنە ريزاشىلىعىن ءبىلدىردى. قۇنارلى توپىراقتىڭ قۇر بولمايتىنىنا, حالقىمىزعا ءالى تالاي مارعاسقانى بەرەرىنە  سەنىم ءبىلدىردى.

مۇنان كەيىن "باقىتجان بايقاداموۆ الەمى: كومپوزيتور تاعدىرىنىڭ تاعىلىمى" اتتى عىلىمي-پراكتيكالىق كونفەرەنتسيا مازمۇندى ءوتتى. وندا بالنۇر قىدىربەك, قايىرجان ماقانوۆ, حاميتبەك مۇساباەۆ, ەركىن قوجاحمەتوۆ, جۇپار تاتكەنوۆا, قۇلتان ورمانبەك, بالدىرعان بايقاداموۆا سىندى زەرتتەۋشىلەر كومپوزيتور ءومىرىنىڭ بەلگىسىز جاقتارىن, قالدىرعان مۋزىكالىق مۇراسىنىڭ قازاق مادەنيەتىندەگى الاتىن ورنىن باعامدادى.  كومپوزيتوردىڭ شىعارمالارىنان تۇراتىن كونتسەرتتە ە.ومىرزاقوۆ اتىنداعى وبلىستىق فيلارمونياسىنىڭ سۇيەمەلدەۋىمەن اۋدان ونەرپازدارى اننەن شاشۋ شاشتى. بەلگىلى ءانشى عازيزا جۇمەكەنوۆا كومپوزيتوردىڭ اندەرىن ناقىشىنا كەلتىرە ورىنداعاندا   قوڭىر كۇزدە  «الما اعاشتارى جايناعانداي», ءان قۇدىرەتى سالتانات قۇردى. سونىمەن قاتار, كومپوزيتور كەشىنىڭ قۇرمەتىنە كۇيشى انار مۇزداحانوۆا, كومپوزيتور-ءانشى قاليبەك دەربسالدين, تاعى باسقالار ءوز شىعارمالارىن ورىندادى.

ء«بىر ايتا كەتەتىن جاي, قازاق مۋزىكاسىنداعى ەشكىمگە ۇقسامايتىن ءىرى تۇلعا باقىتجان بايقاداموۆ تۋرالى تۋعان جەرى قوستاناي وبلىسىندا وعان ارنالعان تۇڭعىش شارانىڭ كۋاسى بولدىم. بىراق ونەر جۇلدىزى, كلاسسيك كومپوزيتور ءدۇيىم جۇرتقا ورتاق. ونىڭ شىعارمالارى تۋرالى مۇنداي شارالار ەلىمىزدىڭ قاي شالعايىندا وتسە دە, تەك رۋحاني ازىق سىيلارى انىق» دەدى قاليبەك دەربسالدين. 

ال «تويتوبە» الاڭىندا وتكەن توپ بايگە توي قىزىعىن قىزدىرا ءتۇستى.

ءنازيرا جارىمبەت, «ەگەمەن قازاقستان»

قوستاناي وبلىسى, امانكەلدى اۋدانى